कृषी पर्यवेक्षकास लाच घेताना पकडले – करमाळा येथील घटना

करमाळा, ता. १५ : करमाळा शहरात १० हजार रूपयाची लाच घेताना, करमाळा कृषी कार्यालयातील कृषी पर्यवेक्षक भारत शेंडे यांना रंगेहात पकडले आहे.

यात हकीकत अशी, की तक्रारदार व्यक्तीच्या पत्नीच्या नावे शासनाच्या महाडीबीटी या पोर्टलवर अनुदानावर पॉवर टिलर मिळण्यासाठी अर्ज केला होता. त्याबाबत तक्रारदार यांना पुर्व संमती मिळाली. त्यानंतर त्यांनी पावर टिलर खरेदी करून सर्व कागदपत्रे लोड केली परंतू पडताळणी रिपार्ट हा कृषी पर्यवेक्षक भारत शेंडे यांनी द्यावयाचा होता परंतू त्यांनी तो रिपार्ट दिला नाही. सदरचा रिपार्ट देण्यासाठी १०
हजार रूपये द्यावे लागतील असे सांगितले. त्यामुळे तक्रारदार यांनी लाच लुचपत प्रतिबंधक विभागाकडे
तक्रार केली होती. त्यानंतर पोलीस अधिक्षक अमोल तांबे यांच्या मार्गदर्शनाखाली गणेश कुंभार पर्यवेक्षण
अधिकारी यांच्या सह सापळा पथक प्रमुख पोलीस निरीक्षक चंद्रकांत कोळी यांनी करमाळ्यात सापळा
लावला.

त्यानुसार तक्रारदाराकडून १० हजार रूपये घेताना कृषी पर्यवेक्षक भारत शेंडे यास लाचलुचपत प्रतिबंधक विभागाने रंगेहात पकडले. याकामी करमाळा पोलीसात गुन्हा दाखल केला जात आहे. या प्रकरणी पोलीस हावलदार प्रमोद पकाले, पोलीस कॉन्स्टेबल गजानन किनगी चालक पोलीस हावलदार राहुल गायकवाड यांनी या कारवाईत भाग घेतला होता.