मोरवड तंटामुक्त समिती अध्यक्षपदी बापू दिवटे यांची पुनर्निवड
करमाळा/ संदेश प्रतिनिधी :
करमाळा, ता.26 : मोरवड (ता. करमाळा) येथील गावातील तंटामुक्त समितीच्या अध्यक्षपदी बापू दिवटे यांची पुन्हा एकदा निवड करण्यात आली. मागील कार्यकाळात त्यांनी दाखविलेली कामगिरी, न्यायनिष्ठ भूमिका आणि सर्वांना सोबत घेऊन चालण्याची वृत्ती लक्षात घेऊन ग्रामस्थांनी त्यांच्यावर विश्वास व्यक्त केला.
गेल्या कार्यकाळात बापू दिवटे यांनी गावातील छोटे-मोठे वाद, जमिनी संबंधित वाद, कुटुंबीयांतील मतभेद अशा अनेक प्रकरणांचे शांततेत व समेटातून निवारण केले. गावात सौहार्दाचे वातावरण निर्माण करून “तंटामुक्त गाव” या संकल्पनेला खरी दिशा दिली. त्यांच्या नेतृत्वामुळे ग्रामस्थांमध्ये परस्पर विश्वास वाढला आणि गावात एकात्मतेचे वातावरण निर्माण झाले.
त्यांच्या या कार्याचा गौरव म्हणून नुकत्याच झालेल्या सभेत त्यांची सर्वानुमते पुन्हा अध्यक्षपदी निवड करण्यात आली. निवडीनंतर ग्रामस्थांच्या वतीने त्यांचा सत्कार करण्यात आला. यावेळी गावातील ज्येष्ठ नागरिक तसेच तरुणांनी पुष्पहार, शाल-श्रीफळ देऊन अभिनंदन केले.
यावेळी बोलताना बापू दिवटे म्हणाले की, “गाव तंटामुक्त ठेवणे ही एक सामूहिक जबाबदारी आहे. प्रत्येकाने सौहार्द जपले तर गाव अधिक प्रगतीपथावर जाईल. मला दिलेला विश्वास मी कायम राखेन आणि न्यायनिष्ठ कामकाज पुढेही करत राहीन.” गावकऱ्यांच्या उत्स्फूर्त प्रतिसादामुळे कार्यक्रमाचे औचित्य अधिकच वाढले. यावेळी गावातील सर्व मान्यवर उपस्थित होते.
