शालेय जिल्हास्तरीय मल्लखांब स्पर्धेत यशवंतराव चव्हाण महाविद्यालयाच्या विद्यार्थ्यांचे यश
करमाळा : महाराष्ट्र राज्य क्रीडा व युवक सेवा संचालनालय अंतर्गत जिल्हा क्रीडा अधिकारी कार्यालय, सोलापूर व भारत हायस्कूल, जेऊर यांच्या संयुक्त विद्यमाने आयोजित जिल्हा शालेय मल्लखांब व रोप मल्लखांब स्पर्धा दिनांक ९ ऑक्टोबर २०२५ रोजी उत्साहात पार पडल्या.
या स्पर्धेत सोलापूर जिल्ह्यातील अनेक शाळा व महाविद्यालयांतील खेळाडूंनी सहभाग घेतला होता. यामध्ये यशवंतराव चव्हाण महाविद्यालय, करमाळा येथील इयत्ता अकरावी विज्ञान शाखेतील विद्यार्थिनी वैष्णवी राहुल बाबर हिने १७ वर्षाखालील गटात तर अदिती जितेंद्र चांदगुडे हिने १९ वर्षाखालील गटात विजय मिळवला. दोन्ही खेळाडूंची पुणे येथे होणाऱ्या विभागीय स्पर्धेसाठी निवड झाली आहे.
या यशाबद्दल संस्थेचे सचिव विलासराव घुमरे, अध्यक्ष प्राचार्य मिलिंद फंड, सहसचिव विक्रमसिंह सूर्यवंशी, महाविद्यालयाचे प्राचार्य डॉ. एल. बी. पाटील, वरिष्ठ विभागाचे उपप्राचार्य डॉ. अनिल साळुंखे, कनिष्ठ विभागाचे उपप्राचार्य संभाजी किर्दाक, शारीरिक शिक्षण विभाग प्रमुख प्रा. रामकुमार काळे तसेच सर्व प्राध्यापक व शिक्षकेतर कर्मचारी यांनी वैष्णवी व अदितीचे अभिनंदन करून पुढील वाटचालीस शुभेच्छा दिल्या.
