पुस्तकाबाहेरचे शिक्षण: रावगावच्या बाल आठवडी बाजाराला गावकऱ्यांचा उदंड प्रतिसाद
करमाळा : पुस्तकी ज्ञानासोबत प्रत्यक्ष व्यवहाराचे शिक्षण’ या ध्येयावर चालत पंडित जवाहरलाल नेहरू विद्यालय, रावगाव येथे आयोजित करण्यात आलेल्या ‘बाल आठवडी बाजार’ या उपक्रमाने संपूर्ण गावाचे लक्ष वेधून घेतले आहे. हा केवळ एक शालेय उपक्रम न राहता, सर्जनशीलता, शिस्त आणि स्वावलंबन यांचा त्रिवेणी संगम ठरला.
विद्यार्थ्यांनी अतिशय कल्पकतेने उभारलेल्या विविध स्टॉल्सवर नैसर्गिक आणि सेंद्रिय शेतीमाल, घरगुती पौष्टिक स्नॅक्स, पर्यावरणपूरक हस्तकला वस्तू यांचे प्रदर्शन होते. आकर्षक मांडणी, स्वच्छ परिसर आणि विद्यार्थ्यांच्या विनम्र संवादामुळे प्रत्येक स्टॉलवर ग्राहकांची मोठी गर्दी होती. विशेषतः मुलांनी स्वतः हाताने तयार केलेले स्नॅक्स आणि घरगुती भाज्यांचे स्टॉल्स विक्रीचे केंद्रबिंदू ठरले.
या बाजारातून विद्यार्थ्यांनी मोजकं भांडवल व्यवस्थापन, किंमत निर्धारण, नफा-तोटा याची गणिते, स्वच्छता, नम्र ग्राहक संवाद आणि सामूहिक कार्य यांसारखी अत्यंत महत्त्वाची जीवनकौशल्ये प्रभावीपणे आत्मसात केली. मुलांच्या या गुणवत्तेचे पालकांनी देखील विशेष कौतुक केले.
या निमित्ताने शाळेतील ज्येष्ठ शिक्षक श्री. किरण परदेशी यांनी सांगितले, “आज विद्यार्थ्यांनी दाखवलेले उत्कृष्ट व्यवहारज्ञान आणि सर्जनशील पुढाकार आम्हा सर्वांसाठी अभिमानास्पद आहे. बाल आठवडी बाजार हा उपक्रम भावी पिढीत जबाबदारीची जाणीव रुजविण्यासाठी अत्यंत महत्त्वाचे पाऊल आहे.”
या उपक्रमासाठी रावगाव ग्रामपंचायतचे आजी-माजी पदाधिकारी, शाळा व्यवस्थापन समिती आणि पालक प्रतिनिधी मोठ्या प्रमाणात उपस्थित होते. संपूर्ण शिक्षकवृंदाच्या सुयोग्य मार्गदर्शनाखाली आणि पालकांच्या उत्स्फूर्त सहभागाने रावगावचा हा बाल आठवडी बाजार खऱ्या अर्थाने एक प्रेरणादायी शैक्षणिक पर्वणी ठरला.
