सरपडोह येथील श्री सर्पनाथ मंदिराच्या विकासासाठी तिर्थक्षेत्र आराखड्यातून निधी मिळवून देणार – पृथ्वीराज पाटील

करमाळा: सरपडोह येथील श्री सर्पनाथ मंदिराचा समावेश तिर्थक्षेत्र विकास आराखड्यात करून निधी उपलब्ध करून आणखी विकास करण्यात येईल, असे ठाम आश्वासन युवा नेते पृथ्वीराज पाटील यांनी शेतकऱ्यांना दिले. सरपडोह येथे सुरू असलेल्या विकासकामांच्या भूमिपूजनप्रसंगी ते बोलत होते.

करमाळा–माढा विधानसभा मतदारसंघाचे आमदार नारायण पाटील यांच्या स्थानिक आमदार निधीतून श्री सर्पनाथ मंदिर सभामंडप बांधकामासाठी १० लाख रुपयांचा निधी मंजूर करण्यात आला आहे. प्रशासकीय मंजुरी मिळाल्यानंतर या कामाचा भूमिपूजन सोहळा पृथ्वीराज पाटील यांच्या हस्ते पार पडला.

यावेळी बोलताना पृथ्वीराज पाटील म्हणाले की, सरपडोह ग्रामस्थांच्या जमिनींच्या वर्ग–१ संदर्भातील प्रश्न लवकरच मार्गी लागेल. शेतकऱ्यांना त्यांच्या जमिनीची हक्काची नोंद उताऱ्यावर करता यावी, तसेच शासनाच्या विविध लाभ योजनांचा आणि बँकांच्या माध्यमातून शेती व घरकुलासाठी कर्जाचा लाभ मिळावा, यासाठी आमदार नारायण पाटील सातत्याने प्रयत्न करत आहेत. हा प्रश्न लवकरच महसूल मंत्री चंद्रशेखर बावनकुळे यांच्यासमोर मांडण्यात येणार असून, मंत्रालयीन पातळीवर बैठक घेण्याची मागणी केली जाणार असल्याचेही त्यांनी सांगितले.

या कार्यक्रमास मार्गदर्शक प्रा. अर्जुन सरक, पाटील गटाचे प्रवक्ते सुनील तळेकर, सौंदे गावचे सरपंच ज्योतीराम लावंड, कृषी उत्पन्न बाजार समितीचे संचालक बाळासाहेब पवार, माजी सरपंच ज्ञानेश्वर कळसे, शिवाजी पाटील गुळसडी, उपसरपंच संजय तोरमल, माजी सरपंच मुकेश राऊत (कोंढेज), युवा उद्योजक दत्ताभाऊ जगदाळे, संजय तनपुरे, प्रशांत पाटील वरकटणे, अंगद वीर शेलगाव, कोंढेज येथील सरपंच बादल, पत्रकार योगेश खंडागळे, ग्रामपंचायत सदस्य योगेश कर्णवर (जेऊर), युवराज भोसले, विजय शिंदे, सरफडोहचे सरपंच पांडुरंग वाळके, उपसरपंच नाथराव रंधवे, सोसायटी चेअरमन लक्ष्मण खराडे यांच्यासह अनेक मान्यवर व ग्रामस्थ मोठ्या संख्येने उपस्थित होते.कार्यक्रमाचे प्रास्ताविक नाथासाहेब रंधवे यांनी केले, तर आभार सरपंच पांडुरंग वाळके यांनी मानले.