करमाळ्यातील कृषी प्रदर्शनाचे आज सायंकाळी ४ वाजता उद्घाटन – राज्यातील विविध मान्यवरांची उपस्थिती..
करमाळा / संदेश प्रतिनिधी :
करमाळा : राज्याचे माजी मंत्री स्व.दिगंबरराव बागल यांच्या 68 व्या जयंतीच्या निमित्ताने करमाळा येथील यशवंतराव चव्हाण महाविद्यालयाच्या मैदानावर ९ मार्च ते १३ मार्च दरम्यान कृषी प्रदर्शनाचे आज (ता.९) सायंकाळी ४ वाजता उद्घाटनाचा कार्यक्रम संपन्न होणार आहे. याप्रसंगी राज्यातील विविध पक्षाचे मंत्री तसेच खासदार, आमदार, पालकमंत्री, विविध प्रशासकीय अधिकारी उपस्थित राहणार आहेत.
या कृषी प्रदर्शनासाठी उभारण्यात येत असलेल्या स्टॉल आणि मंडपाची पाहणी राज्य साखर संघाच्या संचालिका व या कृषी प्रदर्शनाच्या मुख्य निमंत्रक रश्मी बागल यांनी काल (ता.८) केली.
यावेळी बाजार समितीचे उपसभापती चिंतामणी जगताप, भारतीय जनता पक्षाचे शहराध्यक्ष जगदीश आगरवाल, नगरसेवक सचिन घोलप, विजयकुमार लावंड, शिवसेनेचे बाळासाहेब कटारिया, सरपंच स्वप्निल गोडगे संदिप शेळके आदी मान्यवर उपस्थित होते. या कृषी प्रदर्शनासाठी करमाळा तालुक्यातील नागरिकांनी व शेतकऱ्यांनी उपस्थित राहण्याचे आवाहन माजी आमदार शामलताई बागल, दिग्विजय बागल व निमंत्रक रश्मी बागल यांनी केले आहे.
