जातेगावचे सुपुत्र प्रा.डॉ. हनुमंत शिंदे यांना सावित्रीबाई फुले पुणे विद्यापीठाचा पुरस्कार प्रदान

करमाळा (संदेश प्रतिनिधी) : जातेगावचे सुपुत्र व भोसरी (पुणे) येथील भगवान महावीर शिक्षण संस्थेच्या प्रितम प्रकाश महाविद्यालयात अर्थशास्त्र विभाग प्रमुख पदावर कार्यरत असलेले प्रा. डॉ. हनुमंत शिंदे यांचा नुकताच सावित्रीबाई फुले पुणे विद्यापीठाकडून राष्ट्रीय सेवा योजनेतील भरीव कार्याबद्दल ४ ऑगस्ट रोजी पुरस्कार देऊन सन्मानित करण्यात आले.

यावेळी कुलगुरू प्रोफेसर डॉ. सुरेश गोसावी, कुलसचिव मा . डॉ. प्रफुल्ल पवार, व्यवस्थापन मंडळाचे सदस्य मा. डॉ. संदीप पालवे, मा. प्राचार्य डॉ. देविदास वायदांडे, मा. प्राचार्य डॉ. नितीन घोरपडे, मा. डॉ. रवींद्र शिंगणापूरकर, श्रीमती बागेश्री मंठालकर, राष्ट्रीय सेवा योजनेचे संचालक डॉ. सदानंद भोसले यांच्या हस्ते उत्कृष्ठ संघनायक म्हणून श्री. शिंदे यांना पुरस्कार, स्मृतीचिन्ह व प्रशस्तीपत्र देऊन सन्मानित करण्यात आले. यावेळी विद्यापीठाच्या कार्यक्षेत्रातील विविध महाविद्यालयाचे प्राचार्य, प्राध्यापक व विद्यार्थी मोठ्या संखेने उपस्थित होते.

डॉ. हनुमंत शिंदे यांनी २०१६-१७ ते २०१९-२० या काळात राष्ट्रीय सेवा योजनेअंर्तगत विद्यापीठ पातळीवर पिंपरी-चिंचवड विभाग समन्वयक म्हणून व महाविद्यालय पातळीवर कार्यक्रम अधिकारी म्हणून उल्लेखनीय कार्य केले. संघनायक म्हणून आळंदी – पंढरपूर रासेयो वारी, कोल्हापूर- सांगली महापूर आपत्ती व्यवस्थापन शिबिर, नदीस्वच्छता उपक्रम, कडुनिंबाच्या रोपांच्या वाटपासंदर्भातील गिनिज वर्ल्ड रेकॉर्ड या उपक्रमात विद्यापीठाचे नेत्रुत्व केले. तसेच रासेयो च्या नियमित कार्यक्रम व विशेष शिबिराच्या माध्यमातून वृक्षारोपण – वृक्षसंवर्धन, जलसंधारण व जलसंवर्धन, अंधश्रद्धा निर्मूलन, ग्रामस्वच्छता अभियान, जनजागृती विषयक विविध उपक्रमांमध्ये सहभाग व अंमलबजावणी यामध्ये भरीव योगदान दिले. याचबरोबर डॉ. शिंदे यांनी कोरोना महामारीच्या काळात रासेयो स्वयंसेवकांच्या साहाय्याने कोरोना संदर्भात जनजागृती बरोबरच गरजू कुटुंबाना सॅनिटाझर , मास्क आणि जीवनावश्यक वस्तूंचे मोफत वाटप यांसारख्या सामाजिक उपक्रमातून कोरोना संकटात लोकांना दिलासा देण्याचे काम केले.

डॉ. हनुमंत शिंदे यांच्या सन्मानाबद्द्ल संस्थेचे अध्यक्ष डॉ. अशोककुमार पगारिया, प्राचार्य सदाशिव कांबळे यांच्यासह डॉ. विजय निकम, सुधाकर बैसाने, प्रविण म्हस्के, सचिन पवार, डॉ. स्वाती वाघ, विभा ब्राह्मणकर, महालक्ष्मी शिरसाट या प्राध्यापकांबरोबरच सर्व विद्यार्थ्यांनी व जातेगाव येथील ग्रामस्थ तसेच करमाळा तालुक्यातील राजकीय, सामाजिक व शैक्षणिक क्षेत्रातील मान्यवरांनी अभिनंदन केले.