जिल्हा प्राथमिक शिक्षक सह. पतसंस्थेचा ‘आदर्श शिक्षक’ पुरस्कार ओंभासे यांना प्रदान
करमाळा (दि.२३) – सोलापूर जिल्हा प्राथमिक शिक्षक सहकारी पतसंस्था नियमित सोलापूर दरवर्षी उपक्रमशील प्राथमिक शिक्षक सभासदांचा ‘आदर्श शिक्षक’ हा पुरस्कार देऊन गौरव करत असते. यावर्षीचा पुरस्कार संस्थेने करमाळा तालुक्यातील जिल्हा परिषद प्राथमिक शाळा जांभूळझरा (वीट ) या शाळेतील शिक्षक श्री सयाजीराजे केशव ओंभासे यांना प्रदान केला. हा आदर्श शिक्षक पुरस्कार वितरण सोहळा रविवार दिनांक २२ सप्टेंबर रोजी विठ्ठल-रुक्मिणी पॅलेस, कोर्टी रोड,पंढरपूर या ठिकाणी पार पडला.
श्री सयाजीराजे ओंभासे यांची प्राथमिक शिक्षणातील भरीव कार्याची, उल्लेखनीय उपक्रमांची त्याचबरोबर सामाजिक कार्यातील योगदानाची दखल पतसंस्थेच्या संचालक मंडळांनी घेतली. सन्मानचिन्ह,प्रमाणपत्र व धनादेश देऊन त्यांचा सहकुटुंब गौरव करण्यात आला. यावेळी महाराष्ट्र राज्य शिक्षक संघाचे कार्यकारी अध्यक्ष श्री म.ज. मोरे, राज्याच्या शिक्षक संघाचे सल्लागार श्री. बाळासाहेब काळे, आदर्श शिक्षक समितीचे माजी राज्याध्यक्ष श्री.अंकुश काळे, पतसंस्थेचे चेअरमन श्री रामचंद्र यादव, करमाळा तालुका शिक्षक संघाचे अध्यक्ष तथा विद्यमान संचालक श्री. हनुमंत सरडे त्याचबरोबर संपूर्ण संचालक मंडळ इत्यादी मान्यवर हजर होते.
