वडिलांच्या स्मरणार्थ उत्तरेश्वर अन्नछत्रासाठी ५१ हजार रूपयांची देणगी
केम (संजय जाधव):केम येथील ज्येष्ठ नागरिक आणि बागायतदार बाजीराव तळेकर यांनी आपल्या वडील कै. नारायण आबा तळेकर यांच्या स्मरणार्थ उत्तरेश्वर देवस्थानच्या उत्तरेश्वर अन्नछत्र उपक्रमासाठी ५१,००० रुपये देणगी दिली आहे. ही देणगी कायमस्वरूपी अक्षय ठेव योजना अंतर्गत देण्यात आली असून, या रकमेच्या वार्षिक व्याजातून दरवर्षी एका सोमवारी अन्नदान करण्यात येणार आहे.
सोमवार, दि. १४ जुलै २०२५ रोजी या प्रसंगी मंदिरात देवस्थान ट्रस्टच्या वतीने श्री बाजीराव तळेकर व त्यांचे चिरंजीव सुनिल तळेकर यांचा श्रीफळ देऊन सत्कार करण्यात आला.
सत्कार समारंभात ट्रस्टचे ज्येष्ठ विश्वस्त श्री अरुण वासकर, ट्रस्टचे सचिव श्री मनोजकुमार सोलापूरे व विश्वस्त अवधूत येवले उपस्थित होते.
उत्तरेश्वर अन्नछत्र उपक्रम हा उत्तरेश्वर देवस्थानतर्फे गेल्या अनेक वर्षांपासून राबविण्यात येत असून, या योजनेद्वारे भक्तगण आपल्या आई-वडील वा प्रिय व्यक्तींच्या स्मरणार्थ अन्नदान करत आहेत. या उपक्रमात केम गावातील अनेक दानशूर भक्तांचा उत्स्फूर्त सहभाग लाभत असून, समाजात दानशीलतेचा आणि सेवा-भावनेचा उत्तम आदर्श निर्माण होत आहे.
