पोथरे येथे विविध सामाजिक उपक्रम राबवून शांततेत गणरायांना निरोप..
करमाळा / संदेश प्रतिनिधी : पोथरे (ता.करमाळा) येथे एक गाव एक गणपती ही संकल्पना राबवून पोथरे गावात एकच गणपती मूर्तीची स्थापना करण्यात आली होती, याप्रसंगी विविध सामाजिक उपक्रम राबविण्यात आले. येथील श्री गणेशाचे १७ सप्टेंबर रोजी सायंकाळी विसर्जन करण्यात आले.
याप्रसंगी गणरायाचे विसर्जन अगदी साध्या पध्दतीने गुलालविरहीत व डी.जे. बॅंजो विना मिरवणूक काढण्यात आली. हलगीच्या तालावर तरुणांनी वाजत गाजत गणारायाला निरोप दिला. या मिरवणुकीदरम्यान तरुणांच्या डोक्यावरील फेटे सर्वांचे लक्ष वेधत होते. पोथरे येथे गणपती कालावधीत मंडळामार्फत विविध कार्यक्रमाचे आयोजन करण्यात येते. तसेच शेवटच्या दिवशी कोणताही अनावश्यक खर्च न करता मिरवणूक काढण्यात आली, तसेच खर्चाला फाटा देवून सामाजिक कार्यात भर देण्यात आला. मिरवणुकीदरम्यान ट्रॉलीमध्ये श्री गणरायाची मूर्ती ठेवून त्याठिकाणी आकर्षक सजावट करण्यात आली होती. यावेळी मंडळातील सर्व सद्स्यांनी आकर्षक फेटे तसेच विविध वेशभूषा परिधान केल्याने अनेकांचे लक्ष वेधून घेतले होते. ही मिरवणूक पाहण्यासाठी पोथरे येथील नागरिकांनी गर्दी केली होती.
