अखेर अंकुश नाळे गेले..!

करमाळा / संदेश प्रतिनिधी

करमाळा, ता. १० : मोठमोठ्या हॉस्पिटल मधील डॉक्टरही चुकतात हे आपण नेहमी ऐकतो. पण त्याची प्रचिती आज (ता. १०) करमाळेकरांना आलेली आहे. सुमंतनगर मधील रहिवाशी असलेले व सहारा इंग्लीश स्कुलमध्ये कार्यरत असलेले अंकुश नाळे यांचेवर बारामती येथे खाजगी रूग्णालयात उपचार सुरू होते. उपचार सुरू असतानाच डॉक्टरांनी नाळे गेले, असे घोषित केले आणि नातेवाईकांना घेऊन जाण्यास सांगितले. त्यानुसार ही बातमी हा.. हा.. म्हणता सर्वत्र पसरली. अनेकांनी भावपूर्ण श्रध्दांजली स्टेटस ठेवले. १० फेब्रुवारीला रात्री दहा वाजता अंत्यसंस्काराची वेळ ठरवली. ही बातमी जाहीर होताच आणि नाळे यांना बारामतीवरून खाजगी वाहनातून करमाळा येथे आणत असताना रस्त्यातच ते सावध झाले आणि त्यांनी डोळे उघडले. त्यानंतर निधनाचे स्टेटस रिम्हू करण्यात आले आणि नाळे यांना करमाळा येथील खाजगी हॉस्पिटल मध्ये दाखल करण्यात आले. रूग्णालयात उपचारही सुरू झाले आणि आता त्यांना पुन्हा चांगले आयुष्य मिळणार; अशा चर्चा सुरू झाल्या परंतु दुर्दैवाने साडेनऊच्या सुमारास नाळे यांचे निधन झाले. अंकुश केरबा नाळे (वय – ६१, रा. मोरवड ) यांचे उपचार चालू असताना आज (ता. १०) रात्री साडेनऊ वाजता खाजगी रूग्णालयात निधन झाले. त्यांच्या मागे पत्नी, दोन मुले, सुन, नातवंडे असा परिवार आहे. साईराज टूर्स ॲन्ड ट्रॅव्हल्स चे मालक अमोल नाळे यांचे ते वडील होत. त्यांचेवर रात्री साडेदहा वाजता नगररोडवरील अमरधाम स्मशानभुमीत अंत्यसंस्कार करण्यात येणार आहेत.