किरकोळ कारणावरून चौघांना मारहाण
करमाळा / संदेश प्रतिनिधी
करमाळा : शेतात जाणाऱ्या पाईप लाईनला गायी बांधल्याने पाईप फुटला. या कारणावरून झालेल्या भांडणात चौघाजणांनी चौघांना काठीने, दगडाने व लाथा-बुक्क्यांनी मारहाण केली आहे. हा प्रकार ४ ऑगस्टला सकाळी साडेनऊ वाजता घोटी (ता. करमाळा) येथे घडला आहे. या प्रकरणी रामचंद्र रंगनाथ ननवरे यांनी फिर्याद दिली आहे.
त्यात त्यांनी म्हटले आहे, की आमच्या शेतातील झेंडूच्या पिकास पाणी देण्याकरीता केलेल्या पाईप लाईनला पुजा समाधान ननवरे हिने गायी बांधली होती. त्या गायीने पाईप फोडला. तो पाईप व्यवस्थित करून दे.. असे म्हटल्यावरून पुजा ननवरे, सिध्दू दगडू ननवरे, शोभा सिध्दू ननवरे या तिघांनी काठीने, दगडाने व लाथाबुक्क्यांनी मारहाण केली आहे. या प्रकरणी पोलीसांनी गुन्हा दाखल केला असून पुढील तपास पोलीस उपनिरीक्षक विनायक माहुरकर हे करत आहेत.
