करमाळा नगरपरिषद निवडणूक : प्रचार कालावधी कमी असल्याने सर्वांचीच धांदल !
करमाळा/ संदेश प्रतिनिधी :
करमाळा : नगरपालिका निवडणुकीमध्ये निवडणूक आयोगाने निवडणुकीचा विशेषत: प्रचाराचा कालावधी खूपच कमी ठेवलेला आहे. त्यामुळे नगराध्यक्ष पदाच्या उमेदवारासह सर्वच उमेदवारांची धांदल उडाली आहे.
यापूर्वी निवडणुकीचा कार्यक्रम जवळपास एक महिनाभर चलत असे. तो कार्यक्रम यावेळी तीन आठवड्यावर येऊन ठेपला. सन २०१६ च्या निवडणुकीचा कार्यक्रम जर आपण पहिलातर त्यामध्ये २४ ते २९ ऑक्टोबर उमेदवारी अर्ज दाखल करणे, २ नोव्हेंबरला अर्जाची छाननी, ११ नोव्हेंबरला उमेदवारी अर्ज मागे घेणेची तारीख त्याच दिवशी चिन्ह वाटप व अंतिम यादी.
त्यानंतर २७ नोव्हेंबरला मतदान होते. म्हणजे या कार्यक्रमात प्रचारासाठी जवळपास १५ दिवस मिळाले आहेत. या निवडणुकीत १० ते १७ नोव्हेंबर उमेदवारी अर्ज दाखल करणे, १८ नोव्हेंबर छाननी, २१ नोव्हेंबर पर्यंत अर्ज मागे, २६ नोव्हेंबरला चिन्ह वाटप व अंतिम यादी आणि २ डिसेंबरला मतदान. म्हणजे या निवडणुकीत अवघे पाच दिवस प्रचारासाठी आहेत. यामुळे उमेदवारांची धांदल उडाली आहे. विशेषत: नगराध्यक्ष पदाच्या उमेदवारांना संपूर्ण शहराभरात मतदारांशी संपर्क साधणे, सभा घेणे त्याचबरोबर पदयात्रा काढणे; असे विविध उपक्रम या पाच दिवसात कसे राबवायचे ? हा प्रश्न उमेदवारा समोर उभा राहिला आहे.
