करमाळा तालुक्यात विविध विकासकामे मार्गी – यापुढेही चांगली कामे करणार : खासदार नाईकनिंबाळकर

करमाळा / संदेश प्रतिनिधी : करमाळा तालुक्यात आपण आजपर्यंत विविध प्रश्न मार्गी लावले आहेत, यामध्ये रेल्वे चे प्रश्न, रस्त्यांचे, पाण्याचे तसेच कुकडीच्या पाण्यासाठीनिधी, मांगी तलाव कुकडीत समावेश, दहिगाव पाण्याचे प्रश्न असे विविध कामे आपण मार्गी लावले असून, यापुढेही करमाळा तालुक्यात नक्कीच चांगले काम करून दाखवू असे मत माढा लोकसभा मतदारसंघाचे खासदार रणजितसिंह नाईकनिंबाळकर यांनी व्यक्त केले.

भाजपचे जिल्हा युवा मोर्चाचे जिल्हाध्यक्ष शंभूराजे जगताप यांनी माजी आमदार जयवंतराव जगताप यांचे मार्गदर्शनाखाली ‘स्नेह संमेलन सोहळ्याचे आयोजन आज (ता.30) सायंकाळी 6 वा.करमाळा शहरातील सटवाई येथील फार्महाऊस येथे केले होते, यावेळी खासदार श्री.नाईकनिंबाळकर बोलत होते. याप्रसंगी व्यासपीठावर भाजपाच्या धनश्री खटके, राजकुमार पाटील, भाजपचे जिल्हा सरचिटणीस गणेश चिवटे, माजी नगराध्यक्ष वैभवराजे जगताप आदी मान्यवर उपस्थित होते.

पुढे बोलताना खा.नाईकनिंबाळकर म्हणाले कि, भाजपा ने जरी मला निवडून दिले तरी खासदार सर्वांचा आहे, करमाळा तालुक्यात आपण रेल्वे चे प्रश्न, रस्त्यांचे, पाण्याचे तसेच आरोग्यविषयक तसेच कुकडीसाठी निधी आणण्याचे काम केले आहे, निरा नदीचे पाणी उजनीत आणण्यासाठी प्रयत्न करत आहे. मांगी तलावाचा कुकडीत समावेश करण्यासाठी आपण प्रयत्न केले आहेत. जनता दरबार, कोरोना काळात अनेक अडचणी सोडवण्यासाठी प्रयत्न केले आहेत. यापुढेही असेच चांगले काम करेन असेही त्यांनी यावेळी बोलताना म्हटले आहे.

याप्रसंगी बोलताना माजी आमदार जयवंतराव जगताप म्हणाले कि, उद्या जर देशाला समृद्ध व्ह्यायचे असेल तर भाजपाशिवाय पर्याय नाही, पंतप्रधान नरेंद्र मोदी व उत्तरप्रदेशचे मुख्यमंत्री योगी आदित्यनाथ या सारख्या नेत्यांची देशाला गरज आहे, खासदार रणजितसिंह नाईकनिंबाळकर यांनी करमाळा तालुक्यात पाणी, रस्ते, आरोग्य तसेच विविध विकासकामासाठी आणलेला निधी अशी विविध विकासाची कामे त्यांनी केलेली आहेत, खा.नाईकनिंबाळकर यांच्या इतकी करमाळा तालुक्यात उपस्थिती कोणाचीही जाणवली नाही, आजपर्यंत अनेक खासदार होवून गेले परंतु पूर्वीचे खासदार निवडणूकिला यायचे ते थेट पुढच्या निवडणूकिला यायचे.. आम्ही मोदी साहेबांच्या कामावर मनापासून प्रेम करतो, उद्या जर देशाला समृद्ध व्ह्यायचे असेल तर भाजपाशिवाय पर्याय नाही, असे मत माजी आमदार जयवंतराव जगताप यांनी व्यक्त केले.

याप्रसंगी कार्यक्रमाचे प्रास्ताविक भाजपचे जिल्हा युवा मोर्चाचे जिल्हाध्यक्ष शंभूराजे जगताप यांनी केले तसेच यावेळी ॲड.नवनाथ राखुंडे, आण्णासाहेब पवार, युसुफ शेख यांची मनोगते झाली. यावेळी कार्यक्रमाचे सूत्रसंचालन श्री.भागडे यांनी केले. या कार्यक्रमासाठी करमाळा तालुक्यातील जगताप गटाचे कार्यकर्ते, पदाधिकारी, तालुक्यातील ग्रामपंचायतीचे सरपंच, उपसरपंच सोसायटीचे पदाधिकारी, आडत व्यापारी, नागरीक आदीजण मोठ्या संख्येने उपस्थित होते.

करमाळा तालुक्याच्या विकासात आपण मोठे योगदान दिले असून, यापुढेही आपणाकडून करमाळा तालुक्यातील काही महत्त्वाची कामे होणे गरजेचे आहे, करमाळा तालुक्यातील काही रखडलेली कामे आपण पूर्ण करावीत, आजच्या कार्यक्रमाला जरी उशीर झाला परंतु, करमाळा तालुक्यात विकासासाठी उशीर होवू देवू नका, मी माजी आमदार जयवंतराव जगताप यांचे मार्गदर्शनाखाली कायम नागरिकांच्या सेवेत राहणार आहे. – शंभूराजे जगताप (जिल्हाध्यक्ष, भाजपा युवा मोर्चा)