निवडणूक कामकाजात वेतनश्रेणीप्रमाणे जबाबदारी द्या – शिक्षक संघटनांची मागणी
करमाळा : आगामी जिल्हा परिषद व पंचायत समिती निवडणूक–२०२६ च्या पार्श्वभूमीवर निवडणूक कामकाजात नेमणूक होणाऱ्या कर्मचाऱ्यांसाठी न्याय्य व संवेदनशील धोरण राबवावे, या मागणीसाठी करमाळा तालुका प्राथमिक शिक्षक समन्वय समितीच्या वतीने निवडणूक निर्णय अधिकारी, तहसील करमाळा यांना सविस्तर निवेदन सादर करण्यात आले.
निवेदनात केंद्राध्यक्ष (Presiding Officer) म्हणून कर्मचाऱ्यांची निवड करताना वेतनश्रेणी (Pay Scale) नुसारच नेमणूक करण्यात यावी, अशी ठाम मागणी करण्यात आली आहे. समान वेतनश्रेणीतील कर्मचाऱ्यांना समान जबाबदारी देण्यात यावी, जेणेकरून निवडणूक कामकाजात कोणताही अन्याय किंवा असमतोल निर्माण होणार नाही, असे समितीने स्पष्ट केले.
तसेच निवडणूक प्रक्रियेत सहभागी होताना कर्मचाऱ्यांना भेडसावणाऱ्या शारीरिक, मानसिक व कौटुंबिक अडचणींचा विचार करून महिला कर्मचारी, दुर्धर आजाराने ग्रस्त कर्मचारी, BLO म्हणून कार्यरत कर्मचारी तसेच ५५ वर्षांवरील वयाचे कर्मचारी यांना निवडणूक कामकाजातून वगळण्यात यावे, अशी मागणीही करण्यात आली आहे.
निवडणूक प्रक्रिया अत्यंत महत्त्वाची असली तरी कर्मचाऱ्यांच्या आरोग्याचा, सुरक्षिततेचा व सामाजिक जबाबदाऱ्यांचा विचार होणे तितकेच आवश्यक असल्याचे समितीच्या वतीने सांगण्यात आले.
योग्य नियोजन व न्याय्य नेमणुकीमुळेच निवडणूक प्रक्रिया पारदर्शक, सुरळीत व तणावमुक्त पार पडू शकते, असेही नमूद करण्यात आले.
या वेळी शिक्षक नेते हनुमंत सरडे, चंद्रहास चोरमले, राजकुमार खाडे, तात्यासाहेब जाधव, प्रमोद काळे, अजित कणसे व महेश निकत उपस्थित होते. प्रशासनाने या मागण्यांकडे सकारात्मक दृष्टीने पाहून योग्य निर्णय घ्यावा, अशी अपेक्षा उपस्थितांनी व्यक्त केली.
करमाळा तालुका प्राथमिक शिक्षक समन्वय समितीच्या या निवेदनामुळे निवडणूक कामकाजातील कर्मचाऱ्यांचे हक्क व कल्याण याबाबत पुन्हा एकदा चर्चा सुरू झाली असून, प्रशासन यावर काय भूमिका घेते याकडे सर्वांचे लक्ष लागले आहे.
