तालुकास्तरीय विज्ञान प्रदर्शनात  राजेश्वर विद्यालयातील पृथ्वीराज दुरंदे व यशराज कामटे यांचा प्रथम क्रमांक

करमाळा/ संदेश प्रतिनिधी
करमाळा,ता.२४: जिल्हा परिषद सोलापूर शिक्षण विभाग, पंचायत समिती करमाळा तसेच नेताजी सुभाष माध्यमिक व उच्च माध्यमिक विद्यालय, केत्तूर–२ यांच्या संयुक्त विद्यमाने दि. २३ व २४ डिसेंबर २०२५ रोजी तालुकास्तरीय विज्ञान प्रदर्शनाचे आयोजन केत्तूर नं.2 येथे करण्यात आले होते.

या स्पर्धेत श्री राजेश्वर विद्यालय, राजुरी येथील विद्यालयातील विद्यार्थी पृथ्वीराज दत्तात्रय दुरंदे (इयत्ता नववी) व यशराज समीर कामटे (इयत्ता बारावी) यांनी नावीन्यपूर्ण, उपयुक्त आणि सामाजिक दृष्ट्या महत्त्वपूर्ण विज्ञान प्रकल्प सादर करत आपल्या गटात प्रथम क्रमांक पटकावला.

या विज्ञान प्रदर्शनात करमाळा तालुक्यातील प्राथमिक स्तरावरील १६० व माध्यमिक स्तरावरील ४८ अशा एकूण २०८ विज्ञान प्रकल्पांचे सादरीकरण करण्यात आले. या
या विद्यार्थ्यांना विद्यालयाचे विज्ञान विषयतज्ज्ञ व मार्गदर्शक प्रा. अमोल सोपान कोल्हे यांचे मोलाचे मार्गदर्शन लाभले. या विद्यार्थांना स्वामी विवेकानंद शिक्षण संस्थेचे संचालक कौस्तुभ गावडे यांच्या हस्ते ट्रॉफी व प्रमाणपत्र देऊन गौरव करण्यात आला.

या दैदीप्यमान कामगिरीमुळे दोन्ही विद्यार्थ्यांची जिल्हास्तरीय विज्ञान प्रदर्शनासाठी निवड करण्यात आली असून, पुढील टप्प्यासाठी त्यांच्याकडून मोठ्या अपेक्षा व्यक्त केल्या जात आहेत.या यशाबद्दल विद्यालयाच्या मुख्याध्यापिका सौ. वैशाली कोल्हे, वैजनाथ स्वामी सेवा मंडळाचे संस्थापक सचिव लालासाहेब जगताप यांनी अभिनंदन केले.