शेतकऱ्यांची थकीत ऊसबीले न मिळाल्यास १२ जुलै रोजी हलगीनाद आंदोलन करणार – प्रा. रामदास झोळ

केम (संजय जाधव) – शेतकऱ्यांची उस बिले तात्काळ मिळवुन द्यावीत जर आम्हाला 10 जुले पर्यंत आमची बिले एफ.आर.पी प्रमाणे 15 टक्के व्याजासहीत नाही मिळाली तर आम्ही आपल्या कार्यालयासमोर 12 जुलै रोजी सकाळी 12 वाजता हलगीनाद आंदोलन करणार असल्याचे मत दत्तकला शिक्षण संस्थेचे अध्यक्ष प्रा. रामदास झोळ यांनी व्यक्त केले.

करमाळा तालुक्यातील शेतकऱ्यांचे ऊसाचे एफ आर.पी बिल त्वरीत देण्यात यावे याबाबतचे निवेदन करमाळा तहसीलदार यांना देण्यात आले असून जाधव रावसाहेब यांनी सदर निवेदन घेऊन याबाबत योग्य ती कार्यवाही करण्याचे आश्वासन दिले आहे.

यावेळी दत्तकला शिक्षण संस्थेचे अध्यक्ष प्रा.रामदास झोळ सर शेतकरी कामगार संघर्ष समितीचे दशरथ आण्णा कांबळे ,स्वाभिमानी शेतकरी संघटनेचे जिल्हा उपाध्यक्ष रवींद्र गोडगे, गणेश मंगवडे,प्रहार संघटनेचे तालुकाध्यक्ष संदीप तळेकर, प्रहार जनशक्ती संघटनेचे जिल्हा सरचिटणीस बापु नेते तळेकर,मकाईचे माजी संचालक हरीभाऊ झिंजाडे अंजनडोहचे माजी उपसरपंच शहाजी माने, राष्ट्रवादी काँग्रेसचे तालुकाध्यक्ष (शरद पवार गट) संतोष वारे ,पोपट फुके ,किसन हानपुडे बबन वीर ,अशोक गोडगे ,भगवान डोंबाळे ,धनाजी जाधव बापु फरतडे इत्यादी शेतकरी उपस्थित होते.

दिलेल्या निवेदनात असे म्हटले आहे की कमलाई साखर कारखाना पांडे ता. करमाळा, मकाई सहकारी साखर कारखाना भिलारवाडी ता. करमाळा, भैरवनाथ साखर कारखाना विहाळ ता. करमाळा या चारही साखर कारखान्यांना गाळप हंगाम 2021-22, 2022-23, 2023-24 मध्ये आम्ही सर्व शेतकऱ्यांनी सदर कारखान्यांना ऊस गाळपासाठी दिला होता. परंतु त्याचे अद्यापही बिल आणि एफ.आर.पी आम्हाला मिळालेले नाही. खालील प्रमाणे कारखान्यांकडुन आमचे येणे बाकी आहे.

1. अदिनाथ स.सा. कारखाना 2023-24 ची थकीत उसबिले एफ. आर.पी प्रमाणे 15% व्याजासहीत येणे बाकी आहेत.
2. कमलाई साखर कारखाना 2023-24 ची थकीत उसबिले एफ.आर.पी प्रमाणे 15% व्याजासहीत येणे बाकी आहेत..
3. मकाई स.सा. कारखाना 2021-22 ची एफ.आर.पी प्रमाणे उसबिल 15% व्याजासहीत येणे बाकी आहेत. 2022-23 ची एफ.आर.पी प्रमाणे उसबिल 15% व्याजासहीत येणे बाकी आहेत. वाहनमालकांचे वाहतुक, कमीशन, डिपॉझीट येणे बाकी आहे. तसेच कारखान्यातील कर्मचाऱ्यांच्या थकीत पगारी देणे बाकी आहे.
4. भैरवनाथ साखर कारखाना 2023-24 ची थकीत उसबिले एफ.आर.पी प्रमाणे 15% व्याजासहीत येणे बाकी आहेत.

नियमानुसार साखर आयुक्त महाराष्ट्र राज्य यांनी या कारखान्यांनवर आर आर सी कारवाईचे आदेश जिल्हाधिकारी कार्यालय सोलापूर तसेच उप प्रादेशीक सह संचालक (साखर) सोलापुर यांना दिले होते त्यानुसार त्यांच्यावर कारवाई झालेली आहे. परंतु आज पर्यंत आम्हाला आमची उस बीले एफ.आर.पी प्रमाणे मिळालेली नाहीत. शेतकऱ्यांची उस बिले तात्काळ मिळवुन द्यावीत. जर आम्हाला 10 जुलैपर्यंत आमची बिले एफ.आर.पी प्रमाणे व्याजासहीत नाही मिळाली तर आम्ही आपल्या करमाळा तहसील कार्यालयासमोर 12 जुलै रोजी सकाळी 12 वाजता हलगी नाद आंदोलन करणार असल्याचा इशारा प्रा. रामदास झोळ सर व त्यांच्या सहकारी नेते शेतकऱ्यांच्यावतीने देण्यात आला आहे.