पोथरे येथे उद्या स्वरदीप दिवाळी पहाट कार्यक्रमाचे आयोजन
करमाळा (दि.३१) – पोथरे (ता.करमाळा) येथे शनिवारी (२ नोव्हेंबर) पहाटे ४ वाजता ‘स्वरदीप दिवाळी पहाट’ हा कार्यक्रम ग्रामस्थांच्यावतीने आयोजित करण्यात आलेला आहे.
पोथरे गावचे पोलीस पाटील व पार्श्वगायक संदीप पाटील प्रस्तुत हा दिवाळी पहाट कार्यक्रम असून त्यांच्या सोबत राज्यातील प्रसिद्ध वादकांच्या साथीने हा कार्यक्रम होणार आहे. यामध्ये भावगीत, भक्तीगीत, चित्रपट गीतांची दर्जेदार मैफल होणार आहे. गायिका रोहिणी, निवेदक रियाज पठाण, गायक कृष्णा जाधव, संगीत संजयोजक अंबरीश जहागीरदार, पॅड व मशीन वादक गौतम गुजर, ढोलकी वादक अंकित करारे हे कला सादर करणार आहेत.
पोथरे येथील शनी मंदिरात हा कार्यक्रम होणार आहे. पहाटे ४ वाजता ऐतिहासिक २१२१ दिव्यांचा भव्य दीपोत्सव सोहळाही यावेळी होणार आहे. यावेळी तहसीलदार शिल्पा ठोकडे, पोलिस निरीक्षक विनोद घुगे, यशकल्याणी सेवाभावी संस्थेचे अध्यक्ष गणेश करे पाटील, सुनील कदम हे उपस्थित राहणार आहेत. यावेळी उपस्थित महिलांसाठी खेळ पैठणीचा हा कार्यक्रम होणार असून पाच विजेत्यांना पैठणी दिली जाणार आहे, असे पाटील यांनी सांगितले. या कार्यक्रमाचा लाभ जास्तीत जास्त रसिकांनी घ्यावा असे आवाहन पार्श्वगायक संदीप पाटील यांनी केले आहे.
