सालसे अपघात दोघेजण ठार तर दोघेजण किरकोळ जखमी
करमाळा / संदेश प्रतिनिधी
करमाळा : सालसे (ता. करमाळा) येथे स्वीफ्ट कारने पुलाला धडक देऊन झालेल्या अपघातात दोघेजण ठार तर दोघेजण किरकोळ जखमी झाले आहेत. हा अपघात ३ फेब्रुवारीला सायंकाळी सात वाजता झाला होता. यात बळीराम सुबराव हजारे (रा. कौडगाव, ता. परांडा) यांनी फिर्याद दिली आहे.
त्यात त्यांनी म्हटले आहे, की दिलीप गोफणे हा कौडगावातील आमचे ओळखीचा असून त्याची ऊस वाहतुकीची टोळी आहे. त्याचा मुलगा विजय गोफणे हा ट्रॅक्टर चालक म्हणून काम करतो. ३ फेब्रुवारीला भैरवनाथ साखर कारखाना विहाळ कडे ऊस घेऊन जात असताना करमाळा शहराजवळ ऊसाची ट्रॉली पलटी झाली होती. तेथे जाण्यासाठी त्याने माझाकडील स्वीफ्ट गाडी मागितली होती.
त्यावेळी आमच्या गावातील बाळू गुलाबराव शिंदे हा या स्वीफ्ट गाडीवर चालक म्हणून आला होता. ऊसाची पडलेली ट्रॉली भरल्यानंतर मी तसेच दिलीप गोफणे, बाळू शिंदे व विलास जाधव आम्ही सर्व कौडगावकडे निघालो होतो. सायंकाळी सात वाजता बाळू शिंदे यांनी सदरची गाडी निष्काळजीपणाने चालवून सालसे येथील ओढ्यावरील पुलाच्या सिमेंटच्या कठड्यास जोराची धडक दिली. त्यात मी स्वत: जखमी झालो तसेच बाळू शिंदे हा ही किरकोळ जखमी झाला. परंतु दिलीप गोफणे व विलास जाधव हे दोघे गंभीर जखमी होऊन ठार झाले आहेत. या प्रकरणी पोलीसांनी कार चालकाविरूध्द गुन्हा दाखल केला आहे.
