तालुकास्तरीय कबड्डी स्पर्धेत जि.प. प्रा. मारकड वस्ती शाळा विजयी
करमाळा : वीट येथे पार पडलेल्या तालुकास्तरीय कबड्डी स्पर्धेत लहान मुलींच्या गटात चिखलठाण (ता. करमाळा) येथील जिल्हा परिषद प्राथमिक मारकड वस्ती शाळेने उत्कृष्ट कामगिरी करीत हिवरवाडी संघावर दणदणीत विजय मिळवून विजेतेपद पटकावले.
सामन्याच्या सुरुवातीपासूनच मारकड वस्तीच्या खेळाडूंनी आक्रमक खेळाची छाप सोडली. अचूक पकडी, वेगवान चढाया आणि सामनाभर दिसलेली संघभावना यांच्या जोरावर त्यांनी हिवरवाडी संघाला सतत बचावावर ठेवले. मध्यंतरानंतरही त्यांच्या खेळातील वेग आणि आत्मविश्वास कायम राहिला आणि शेवटी निर्णायक गुणांच्या फरकाने विजय निश्चित केला.
या यशामागे मुख्याध्यापक तात्यासाहेब जगताप यांचे प्रोत्साहनात्मक मार्गदर्शन आणि शिक्षिका स्वाती पाटील यांच्या नियोजित प्रशिक्षणाचा महत्त्वपूर्ण वाटा असल्याचे संघ व्यवस्थापनाने सांगितले.
विजेत्या संघाचे अभिनंदन करताना करमाळा तालुक्याचे पंचायत समितीचे गटशिक्षणाधिकारी नितीन कदम, बिट विस्तार अधिकारी जयवंत नलवडे, माजी जिल्हा परिषद उपाध्यक्ष राजेंद्र बारकुंड, तसेच देवळाली गावचे माजी सरपंच आशिष गायकवाड यांनी जिल्हास्तरासाठी शुभेच्छा दिल्या. अध्यक्ष गणेश मारकड, उपाध्यक्ष सागर शिनगारे आणि रामदास मकर यांनीही संघाचे मनःपूर्वक अभिनंदन केले. या विजयानंतर मारकड वस्ती शाळेत आनंदाचे आणि उत्साहाचे वातावरण असून मुलींच्या दमदार खेळाची सर्वत्र प्रशंसा होत आहे.
