शेटफळ येथे पाईपलाईनच्या वादातून मारहाण
करमाळा, ता.९:शेटफळ (ना.) (ता. करमाळा) येथे शेतातील पाईपलाईन जोडण्याच्या वादातून एकाच कुटुंबातील सदस्यांमध्ये मारहाण झाल्याची घटना घडली आहे. या प्रकरणी अर्जुन शिवाजी वाघमारे ( रा. शेटफळ ) यांनी करमाळा पोलिस ठाण्यात फिर्याद दाखल केली आहे.
७ नोव्हेंबर ला दुपारी सुमारे १.३० वाजता अर्जुन वाघमारे हे आपल्या वडिलांसह शेतातील बांधावर असलेल्या पाईपलाईनचा प्रेशर वॉल जोडत होते. त्यावेळी चुलते दत्तात्रय बाबु वाघमारे, तसेच चुलत भाऊ दिनेश दत्तात्रय वाघमारे व वैभव दत्तात्रय वाघमारे यांनी तेथे येऊन “तु प्रेशर वॉल जोडू नकोस” असे म्हणत शिवीगाळ व दमदाटी केली.
त्यावेळी अर्जुन यांनी “ही शेतजमीन आमची आहे, आम्ही आमचे शेतात काम करतो आहोत” असे सांगितल्यावर आरोपी चिडले. दत्तात्रय वाघमारे यांनी अर्जुन यांना खाली पाडून लाथाबुक्क्यांनी मारहाण केली. त्यावेळी वडील शिवाजी वाघमारे भांडण सोडवायला आले असता दिनेश व वैभव वाघमारे यांनी त्यांनाही शिवीगाळ व धमक्या दिल्या. यावेळी वैभव वाघमारे यांनी तेथेच पडलेली काठी उचलून अर्जुन यांच्या उजव्या हातावर मारली त्यामुळे ते जखमी झाले.
“तुम्ही येथे शेती कशी करता तेच आम्ही पाहतो” असे म्हणत आरोपींनी हातपाय तोडण्याची धमकी देत घटनास्थळावरून पळ काढला, असे फिर्यादीने नमूद केले आहे.
यानंतर अर्जुन वाघमारे यांनी करमाळा पोलिस ठाण्यात फिर्याद दिली. पोलिसांनी गुन्हा दाखल करून पुढील तपास सुरू आहे.
