भांडण सोडविण्यास गेलेल्या प्रौढास दगडाने मारहाण..
करमाळा / संदेश प्रतिनिधी
करमाळा : भांडण सोडविण्यासाठी गेलेल्या तरुणास भांडणातील व्यक्तीने दगडाने मारहाण करून जखमी केले आहे. हा प्रकार वडशिवणे येथे १७ ऑक्टोबरला सकाळी आठच्या सुमारास घडला आहे. या प्रकरणी ज्योतिराम बबन काळे (रा. वडशिवणे) यांनी फिर्याद दिली आहे.
त्यात त्यांनी म्हटले आहे, की वडशिवणे येथे माझे हरिओम शॉपी असे सीसीटीव्ही बसविण्याचे दुकान आहे. सकाळी आठच्या सुमारास मी दुकान उघडल्यानंतर दुकानच्या शेजारी श्रीमंत कवडे यांच्या पंक्चरच्या दुकानातून भांडणाचा आवाज आला. त्यामुळे काय चाललेय हे पाहण्यासाठी गेलो असता तेथे सोमनाथ काकडे हा चंद्रकांत गोडसे यांना शिव्या देत होता.
त्यावेळी मी त्याला गोडसे हे महाराज आहेत, किर्तनकार आहेत त्यांना का शिवीगाळ करतो असे म्हणालो असता सोमनाथ काकडे यांनी मलाच शिवीगाळ करून लाथाबुक्क्यांनी मारहाण करून तेथे पडलेला दगड उचलून माझ्या डोक्यास, हातास व पायास मारहाण केली. या प्रकरणी पोलीसांनी गुन्हा दाखल केला असून पुढील तपास पोलीस उपनिरीक्षक प्रविण साने हे करत आहेत.
