केम ग्रामपंचायतीत महिलाराज – सरपंचपदानंतर उपसरपंचपद देखील महिलेकडे

केम (प्रतिनिधी/संजय जाधव) – केम ग्रामपंचायतीच्या उपसरपंचपदी श्री ऊत्तरेश्वर परिवर्तन पॅनलच्या अन्वर रमजान मुलाणी यांची बिनविरोध निवड झाली असून आता सरपंच व उपसरपंचपदी दोन्ही महिला असल्याने केम मध्ये प्रथमच महिलाराज आले आहे..

केम (ता.करमाळा) येथे यंदाच्या ग्रामपंचायत निवडणूकीत सरपंचपद थेट जनतेतून निवडले गेले असून हे पद ओबीसी महिलेसाठी राखीव होते. या निवडणूकीतून अजित तळेकर गटाच्या सारिका कोरे या निवडून आल्या होत्या. उपसरपंचपद हे निवडून आलेल्या सदस्यांमधून निवडले जाणार होते. या निवडणुकीत अजित तळेकर गटाचे (मोहिते-पाटील गटाचे) सरपंच व सात सदस्य निवडून आले होते. तर श्री ऊत्तरेश्वर परिवर्तन पॅनलचे दहा सदस्य निवडून आले. त्यामुळे उपसरपंच हा श्री ऊत्तरेश्वर परिवर्तन पॅनलचा होणार हे निश्चित होते. परंतू उपसरपंच पदासाठी या पॅनलमधुन बरेच सदस्य इच्छुक होते, त्यामुळे उपसरपंच कोण होणार याकडे सर्वांचे लक्ष लागले होते.

केम ग्रामपंचायत उपसरपंच निवडणुकीसाठी सरपंच सौ सारिका प्रविण कोरे यांच्या अध्यक्षतेखाली आज (दि.२३) विशेष सभा बोलावण्यात आली होती. या सभेसाठी सर्व ग्रामपंचायत सदस्य उपस्थित होते. आज झालेल्या उपसरपंच पदाच्या निवडणुकीसाठी अजितदादा तळेकर गटाकडून माजी उपसरपंच नागनाथ तळेकर यांनी अर्ज दाखल केला होता तर श्री ऊत्तरेश्वर परिवर्तन पॅनलच्या वतीने सौ अन्वर रमजान मुलाणी यांचा एकमेव अर्ज दाखल झाला. फॉर्म काढून घेण्याची वेळ १ वा.५५ मि. होती, त्याअगोदरच नागनाथ तळेकर यांनी आपला अर्ज माघारी घेतला. त्यामुळे ही निवडणूक बिनविरोध पार पडली व उपसरपंचपदी अन्वर रमजान मुलाणी यांची बिनविरोध निवड झाली.

यावेळी निवडणूक निर्णय अधिकारी म्हणून विस्तार अधिकारी साठे टि.जे. व ग्रामसेवक शेंडे यांनी काम पाहिले. विजयी झालेल्या मुलाणी यांचा सत्कार सरपंच सौ. सारिका कोरे यांनी केला. त्यानंतर सर्व ग्रामपंचायत सदस्यांचा पुष्प गुच्छ व नारळ देउन सत्कार करण्यात आला. या नंतर माजी उपसरपंच नागनाथ तळेकर, सागर दौंड, अच्युत काका पाटील, सागर कुरडे, गोरख पारखे, राहुल आबा कोरे, विजयसिंह ओहोळ यांंची भाषणे झाली. हि निवडणूक शांततेत पार पडली. त्यांनंतर श्री ऊत्तरेश्वर परिवर्तन पॅनलच्या कार्यकत्यांनी फटाक्यांची आतिषबाजी करून जल्लोष साजरा केला.

संबंधित बातमी – केम ग्रामपंचायतीच्या सरपंच पदी सारिका कोरे