रणजितसिंह नाईक-निंबाळकर यांच्या प्रचारार्थ आमदार संजयमामा शिंदे यांचा 36 गावांचा प्रचार दौरा..

करमाळा / संदेश प्रतिनिधी :
करमाळा : माढा लोकसभा निवडणुक महायुतीचे उमेदवार रणजितसिंह नाईक-निंबाळकर यांच्या प्रचारार्थ आमदार संजयमामा शिंदे यांनी करमाळासह माढा तालुक्यातील 36 गावांचा प्रचार दौरा सुरू केला असून त्यांच्या प्रचार दौऱ्याला लोकांचा प्रचंड प्रतिसाद मिळत आहे.

या प्रचार दौऱ्यादरम्यान आमदार शिंदे यांनी बोलताना सांगितले कि, आपण पूर्वी महाविकास आघाडी व त्यानंतर महायुती सोबत राहिलो असून, करमाळा मतदारसंघाच्या विकास कामासाठी जवळपास 2500 कोटीहून अधिक निधी प्राप्त केला असल्याचे आहे, आपल्याला जर मतदारसंघाचा विकास करायचा असेल तर सत्तेसोबत रहायला हवं ही आपली भूमिका आहे.

तसेच पुढे त्यांनी सांगितले कि, 2019 ते 2024 ही पंचवार्षिक निवडणूक महाराष्ट्राच्या इतिहासातील आगळीवेगळी निवडणूक आहे. प्रारंभी सरकार स्थापन व्हायला लागलेला वेळ, त्यानंतर कोरोनामध्ये गेलेला 2 वर्षाचा काळ, सर्व स्थिरस्थावर होऊन विकास कामे सुरू असताना महाविकास आघाडीचे कोसळलेले सरकार आणि त्यानंतर विरोधात आपण घालवलेले जवळपास 1 वर्ष यामुळे करमाळा तालुक्याच्या विकासाला अडसर निर्माण झाला होता.

त्यामुळे फक्त तालुक्याचा विकास डोळ्यासमोर ठेवून आपण अजितदादाच्या नेतृत्वाखाली महायुती सरकारमध्ये सामील झालो. पर्यायाने अवघ्या 1 वर्षात मतदार संघाला तब्बल 1 हजार कोटीहून अधिक निधी मंजूर झाला त्यामुळे तालुक्याचा शाश्वत विकास होण्यास हातभार लागत आहे.

दहिगाव उपसा सिंचन योजना व माढा तालुक्यातील सीना माढा उपसा सिंचन योजना या दोन्ही योजना ची सुरुवात 1995 साली झाली परंतु दहिगाव उपसा सिंचन योजना तब्बल 2018 साली कार्यान्वित झाली तर सीना माढा उपसा सिंचन योजना मात्र 2001 सालीच कार्यान्वित झाली. हा नेत्याच्या दूरदृष्टीचा परिणाम असल्यामुळे आपण फक्त विकासालाच प्राधान्य देतो. त्यामुळे विकासाला साथ द्या व कमळाला मत द्या असे आवाहन आमदार संजयमामा शिंदे यांनी मतदारांना केले.