मालट्रक मधील गॅसचा स्फोट – मालट्रक जळून खाक – मांगीजवळील घटना..
करमाळा / संदेश प्रतिनिधी :
करमाळा : करमाळा-अहमदनगर महामार्गावर मांगी (ता.करमाळा) येथील पुलावर माल ट्रकने अचानक पेट घेतल्याने मालट्रक जळून खाक झाली आहे, यातील ट्रकचालक व क्लिनर किरकोळ जखमी झाले असून, या घटनेनंतर दोघेही तेथून निघून गेले, करमाळा पोलिसांना ही माहिती मिळताच घटनास्थळी पोलिसांनी भेट देवून तातडीने अग्नीशामक दलाची गाडी बोलाविण्यात आली व आग आटोक्यात आणली.
यात प्राथमिक माहिती अशी मिळाली आहे, कि ही ट्रक करमाळाहून पुढे अहमदनगरकडे जात होती, करमाळा शहराकडून पुढे मांगी जवळील पुलावर आल्यानंतर ट्रक मध्ये स्वयंपाक बनविण्यासाठी असलेल्या गॅसचा अचानक स्फोट झाला व त्यामुळे ट्रक पेटली व ट्रकचालक व क्लिनरने तातडीने गाडी थांबून खाली उड्या मारल्या व तेथून निघून गेले. त्यानंतर पोलिसांना माहिती मिळताच पोलिस नाईक श्री.हिंगमिरे, पोलिस नाईक श्री.जगताप, हवालदार शेख, कॉन्स्टेबल श्री.कांबळे, श्री.कदम, श्री.पवार यांनी घटनास्थळी भेट दिली व अग्निशामक गाडीला बोलवल्यानंतर सदर आग आटोक्यात आणण्याचे प्रयत्न केले गेले.
अग्नीशामक गाडी येइपर्यंत बराचवेळ दोन्ही बाजूला मोठ्या प्रमाणात वाहतूक खोळंबली होती. त्यानंतर अग्नीशामक दलाची गाडी आल्यानंतर आग आटोक्यात आणली. सदर प्रकरणी पुढील तपास करमाळा पोलीस करीत आहेत.
