माजी आमदार संजयमामा शिंदे यांचा वाढदिवस विविध उपक्रमांनी साजरा
करमाळा (प्रतिनिधी): करमाळा तालुक्याचे माजी आमदार संजयमामा शिंदे यांचा वाढदिवस त्यांच्या कार्यकर्त्यांकडून ३१ जुलै रोजी करमाळा शहर व ग्रामीण भागात विविध सामाजिक उपक्रमांनी उत्साहात साजरा करण्यात आला.
सकाळी १० वाजता माजी आमदार बबनदादा शिंदे यांच्या आरोग्यासाठी देवीचा माळ (ता. करमाळा) येथील श्री कमला भवानी चरणी प्रार्थना व आरती करण्यात आली. त्यानंतर तहसीलदार शिल्पा ठोकडे यांच्या हस्ते देवीचा माळ येथील जगदंबा मूकबधिर निवासी शाळेतील विद्यार्थ्यांना खाऊ वाटप करण्यात आले. यावेळी सुजित बागल, अॅड. अजित विघ्ने, अॅड. नितीन राजेभोसले, भरत आवताडे यांनी मनोगत व्यक्त केले. तहसीलदार ठोकडे यांनी राष्ट्रवादी काँग्रेस पक्षाच्या वतीने राबवण्यात आलेल्या उपक्रमांचे कौतुक केले.
त्यानंतर सकाळी ११ वाजता विठ्ठल निवास (बायपास रोड) येथे दुचाकी व चारचाकी वाहनांसाठी मोफत PUC तपासणी शिबिराचे उद्घाटन तहसीलदार शिल्पा ठोकडे यांच्या हस्ते झाले. यावेळी पोलीस निरीक्षक रणजित माने यांनी मार्गदर्शन केले.
सकाळी ११.३० वाजता करमाळा येथील उपजिल्हा रुग्णालयात रुग्णांना फळवाटप करण्यात आले. तर भाजप जिल्हा सरचिटणीस गणेश चिवटे आणि गटविकास अधिकारी डॉ. अमित कदम यांच्या हस्ते पांजरा पोळ गोशाळेत जनावरांसाठी चारा वाटप करण्यात आले.
दुपारी १२ वाजता किल्लावेस ते फुलसौंदर चौक दरम्यान वेताळ पेठेतील दोन्ही बाजूंनी काँक्रीट गटारे बांधण्याच्या कामाचे भूमिपूजन नगररचनाकार शशांक भोसले यांच्या हस्ते, तर सार्वजनिक बांधकाम उपविभागाचे स्थापत्य अभियंता संदीप नवले यांच्या उपस्थितीत करण्यात आले.
या सर्व उपक्रमांचे आयोजन राष्ट्रवादी काँग्रेस पक्षाच्या वतीने करण्यात आले होते. या वेळी मकाई सहकारी साखर कारखान्याचे माजी संचालक विवेक येवले, राष्ट्रवादीचे तालुकाध्यक्ष भरत आवताडे, जिल्हा उपाध्यक्ष अॅड. नितीनराजे भोसले, शहराध्यक्ष अॅड. शिवराज जगताप, अशपाक जमादार, राष्ट्रवादी युवकचे जिल्हाध्यक्ष अभिषेक आव्हाड, तालुकाध्यक्ष किरण फुंदे, कार्याध्यक्ष सुजित बागल, तुषार शिंदे, सूरज ढेरे, सचिन वैकर, उदय येवले, राहुल वनारसे, प्रफुल्ल शिंदे, सागर गायकवाड, उद्धव वीर, नंदिनी लुंगारे, सौ. शिंदे, प्रकाश माने आदी उपस्थित होते.
