SIR कामामुळे विद्यार्थ्यांचे नुकसान टाळा; शिक्षक संघटनांचे प्रशासनाला आवाहन

करमाळा (प्रतिनिधी) : करमाळा तालुक्यात सुरू असलेल्या एसआयआर (Special Intensive Revision) कामामुळे प्राथमिक शाळांतील विद्यार्थ्यांच्या शिक्षणावर विपरीत परिणाम होण्याची शक्यता व्यक्त करत करमाळा तालुका प्राथमिक शिक्षक समन्वय समितीच्या वतीने दि. २ जुलै रोजी तहसीलदार, करमाळा यांना सविस्तर निवेदन देण्यात आले. एसआयआर कामासाठी नियुक्त करण्यात आलेल्या शिक्षकांच्या अनुपस्थितीत विद्यार्थ्यांचे शैक्षणिक नुकसान टाळण्यासाठी तातडीने पर्यायी शिक्षकांची व्यवस्था करण्याची मागणी या निवेदनाद्वारे करण्यात आली.

SIR कामामुळे अध्यापनावर परिणाम होण्याची भीती

निवेदनानुसार, दि. ३० जून ते दि. ७ ऑक्टोबर २०२६ या कालावधीत SIR मोहीम राबविण्यात येत आहे. या कालावधीत अनेक प्राथमिक शिक्षकांची नियुक्ती बूथ लेव्हल ऑफिसर (BLO) म्हणून करण्यात आल्याने ते नियमित अध्यापनापासून दूर राहणार आहेत. त्यामुळे इयत्ता पहिली ते आठवीपर्यंतच्या विद्यार्थ्यांच्या शिक्षणावर परिणाम होण्याची भीती शिक्षक संघटनांनी व्यक्त केली आहे.



निवेदनात प्रशासनाकडे पुढील मागण्या करण्यात आल्या आहेत.

• SIR कामासाठी नियुक्त BLO शिक्षकांना पूर्णवेळ कार्यमुक्त करण्यात यावे.
• त्यांच्या अनुपस्थितीत विद्यार्थ्यांचे शैक्षणिक नुकसान टाळण्यासाठी तातडीने पर्यायी शिक्षकांची नियुक्ती करण्यात यावी.
• SIR चे काम नियोजित वेळेत व प्रभावीपणे पूर्ण करण्यासाठी सहायक BLO (Assistant BLO) यांची नियुक्ती करण्यात यावी.
• सहायक BLO यांना BLO प्रमाणेच योग्य मानधन देण्यात यावे.

विद्यार्थीहिताला प्राधान्य देण्याची मागणी

शिक्षक समन्वय समितीने निवेदनात म्हटले आहे की, SIR हे महत्त्वाचे प्रशासकीय काम असले तरी त्याचा थेट परिणाम विद्यार्थ्यांच्या शिक्षणावर होऊ नये, याची जबाबदारी प्रशासनाने घ्यावी. योग्य नियोजन आणि अतिरिक्त मनुष्यबळ उपलब्ध करून दिल्यास निवडणूकविषयक कामे आणि शैक्षणिक कामे दोन्ही प्रभावीपणे पार पाडता येऊ शकतात, असेही निवेदनात नमूद करण्यात आले आहे.

शिक्षकांची उपस्थिती

या निवेदनावर चंद्रहास चोरमले, तात्यासाहेब जाधव, दत्तात्रय जाधव, उमराव वीर, बाळू दुधे, अजित कणसे, संतोष माने, अर्जुन ढेरे, किरण सानप, अशोक दुधे, सुनील जाधव आणि दत्तात्रय जाधव यांनी स्वाक्षऱ्या केल्या. यावेळी शिक्षक संजय चोपडे उपस्थित होते.

प्रशासनाकडून सकारात्मक निर्णयाची अपेक्षा

विद्यार्थीहिताला प्राधान्य देत प्रशासनाने तातडीने सकारात्मक निर्णय घ्यावा, अशी अपेक्षा शिक्षक संघटनांनी व्यक्त केली आहे. पर्यायी शिक्षकांची व्यवस्था आणि सहायक BLO यांची नियुक्ती झाल्यास SIR कामही वेळेत पूर्ण होईल आणि विद्यार्थ्यांचे शैक्षणिक नुकसानही टळेल, असा विश्वास शिक्षकांनी व्यक्त केला.