वडशिवणे येथे ७० हजाराची चोरी
करमाळा / संदेश प्रतिनिधी
करमाळा : घराचा दरवाजा उघडा पाहून दोन अज्ञात चोरट्यांनी घराच्या कपाटातून गंठण व इतर वस्तू असा ७० हजार रूपयांचा ऐवज पळवून नेल्याची घटना वडशिवणे (ता. करमाळा) येथे २३ एप्रिल रोजी पहाटे अडीच वाजण्याच्या सुमारास घडली आहे. याप्रकरणी दत्तात्रय जनार्दन साळुंके या (रा. वडशिवणे) यांनी फिर्याद दिली आहे.
त्यात त्यांनी म्हटले आहे, की २२ एप्रिल रोजी माझी पत्नी शारदा व संदीप यांची पत्नी बाहेरगावी गेल्या होता. रात्री साडेदहा वाजता घरी आम्ही जेवण करून स्लॅपवर झोपलो होतो. तसेच संदीप घराच्या बाहेर तर दुसरा मुलगा सचिन व त्याची पत्नी घराचा दरवाजा उघडा ठेवून आतमध्ये झोपले होते.
घरचा दरवाजा उघडा पाहून दोन अज्ञात चोरट्यांनी घरात शिरून ५० हजार रूपये किंमतीचे सोन्याचे मिनीगंठन, १० हजार रूपये किंमतीचा सॅमसंगचा एलईडी टीव्ही, १० हजार रूपये किंमतीचा विवो कंपनीचा मोबाईल असा एकूण ७० हजार रूपयांचा ऐवज दोन अज्ञात चोरट्यांनी पळवून नेला आहे. याप्रकरणी करमाळा पोलीसांनी दोन अज्ञात चोरट्यांविरूध्द गुन्हा दाखल केला असून पुढील तपास सुरू आहे.
