भाळवणी येथे हातभट्टी दारू काढणाऱ्यावर पोलीसांची कारवाई – २७ हजार ४०० रूपयाचा माल जप्त..
करमाळा / संदेश प्रतिनिधी :
करमाळा : भाळवणी (ता.करमाळा) येथे हातभट्टी दारू काढणाऱ्या तिघांवर पोलीसांनी कारवाई केली आहे. तेथे छापा टाकून २७ हजार ४०० रूपयाची हातभट्टी दारू व दारूचे रसायन रंगेहाथ पकडले आहे. या कारवाईत तिघांपैकी दोन महिलांचा समावेश आहे.
भाळवणी येथे घराच्या जवळच दारू विक्री करणाऱ्या महिलांची माहिती मिळाल्यावर पोलीसांनी १८ ऑक्टोबरला दुपारी पावणेबारा वाजता छापा टाकला असता, तेथे तिघांकडे दारू व दारू रसायन असा २७ हजार ४०० रूपयाचा माल पोलीसांना सापडला आहे. या प्रकरणी पोलीस कॉन्स्टेबल ज्ञानेश्वर प्रभुलिंग घोंगडे व पोलीस कॉन्स्टेबल विलास संपतराव अलदर यांनी फिर्याद दिली आहे. त्यात त्यांनी म्हटले आहे की.. भाळवणी येथे एक महिला हातभट्टी दारू विक्री करतेय, याची माहिती समजल्यावर आम्ही तेथे जावून छापा टाकला असता, त्या महिलेस रंगेहाथ पकडले आहे.
तिच्याकडे प्लॅस्टीकच्या कॅन्डमध्ये ९०० रूपये किंमतीची ९ लिटर हातभट्टी दारू व ३५०० रू. चे १०० लिटर गुळ मिश्रीत रसायन असा ४४०० रूपयाचा माल जप्त करण्यात आला आहे. याच गावात दुसरी महिलाही दारू विक्री करत असल्याचे समजल्यावर तिथे दुपारी साडेबारा वाजता छापा टाकला असता, त्या महिलेकडे १५०० रूपये किंमतीची १५ लिटर हातभट्टी दारू व ७ हजार रूपये किंमतीचे २०० लिटर गुळ मिश्रीत दारू रसायन सापडले आहे. हा ही माल जप्त करण्यात आला असून त्याच्यावर कारवाई करण्यात आली आहे.
याच गावात विजय दत्तू काळे, रा. भाळवणी हा दारू काढत असल्याची माहिती समजल्यावर तेथेही दुपारी साडेतीन वाजता छापा टाकला असता, त्याच्याकडे १४ हजार रूपये किंमतीचे दोन बॅरलमध्ये ४०० लिटर गुळमिश्रीत दारू रसायन सापडले. तर प्लॅस्टीक कॅन्डमध्ये ५०० रूपये किंमतीची पाच लिटर हातभट्टी दारू सापडली आहे. अशाप्रकारे एकूण या तिघांकडून २७ हजार ४०० रूपयाचे दारू व दारू रसायन सापडले आहे. या प्रकरणी पोलीसांनी गुन्हा दाखल केला असून पुढील तपास सुरू आहे.
