रावगाव येथील युवा सोशल फाउंडेशनचे कार्य कौतुकास्पद- प्रताप बरडे

करमाळा / संदेश प्रतिनिधी :

करमाळा : रावगाव येथील सामाजिक कार्य करणाऱ्या  युवा सोशल फाउंडेशनने गेले दहा वर्षे शैक्षणिक क्षेत्रामध्ये व सामाजिक उपक्रमांमध्ये नेहमीच कार्य करत गरीब विद्यार्थ्यांना मदतीचा हात देण्याचे जे कार्य केले आहे हे उल्लेखनीय आहे असे मत मकाई सह साखर कारखान्याचे माजी संचालक प्रताप बरडे यांनी स्वातंत्र्य दिनानिमित्त भाषणातून व्यक्त केले.

यावेळी पुढे बोलताना ते म्हणाले की, युवा सोशल फाउंडेशनचे अध्यक्ष अमोल मुळे, सचिव संतोष काळे, डॉ. मनोज कानडे ,अशोक फुंदे,सोमनाथ मटकर, संतोष आवटे, गुलाब मटकर,अनिल पवार,महेश मोडके या सर्वांच्या सहकार्यातून दरवर्षी शैक्षणिक कार्यामध्ये इ दहावी मध्ये मिळवलेले यश व इतर स्पर्धा परीक्षेतील मुलांच्या यशाबद्दल बक्षीस वाटप केले जाते. त्याचबरोबर रावगाव येथील धनगर वस्ती येथील जि. प. प्राथमिक शाळेच्या विज बलभरणा करण्याचे कार्य, त्याचबरोबर राजीव गांधी वाचनालयास वाचनीय पुस्तके भेट ,शिष्यवृत्ती सराव पेपर वाटप अशा अनेक शैक्षणिक कामांमध्ये झोकून देऊन युवा सोशल फाउंडेशन कार्य करत असून हे कार्य कौतुकास्पद आहे. हे कार्य भावी पिढीतील युवकांना प्रेरणादायी आहे असे मत त्यांनी व्यक्त केले.

यावेळी रावगाव मधील अनेक ग्रामस्थ उपस्थित होते.