करमाळा/ संदेश प्रतिनिधी :
करमाळा : उजनी जलाशय काठावरील शेतीपंपांच्या वीज कपातीविरोधात ‘उजनी धरणग्रस्त संघर्ष समिती’ने पुकारलेले आमरण उपोषण तात्पुरते स्थगित करण्यात आले आहे. जलसंपदा विभागाच्या कार्यकारी अभियंता सुचित्रा डुंबरे यांनी आंदोलकांच्या मागण्यांची दखल घेत वीज पुरवठा पूर्ववत करण्याचे लेखी आश्वासन दिल्यानंतर हा निर्णय घेण्यात आला.
धरणात उपयुक्त पाणीसाठा उपलब्ध असतानाही शेतकऱ्यांना केवळ २ तास वीज देण्याच्या धोरणाविरोधात करमाळा तालुक्यातील शेकडो शेतकऱ्यांनी ९ जुलै रोजी भिमानगर येथील उजनी धरण व्यवस्थापन कार्यालयाला वेढा घातला होता. परिस्थितीचे गांभीर्य ओळखून कार्यकारी अभियंता सुचित्रा डुंबरे आणि उप-कार्यकारी अभियंता ना. बी. खडतरे यांनी मध्यस्थी केली.
लेखी आश्वासनातील मुख्य मुद्दे:
- धरणातील समाधानकारक पाणीपातळी पाहता शेतकऱ्यांची मागणी रास्त असल्याचे प्रशासनाने मान्य केले.
- जिल्हाधिकाऱ्यांच्या आदेशात सुधारणा करून महावितरणमार्फत शेतीपंपांचा वीज पुरवठा दररोज २ तासांवरून वाढवून पूर्ववत (८ ते १० तास) करण्यासाठी वरिष्ठ पातळीवरून तात्काळ आदेश काढले जातील.
“हा धरणग्रस्तांच्या एकजुटीचा विजय आहे. प्रशासनाच्या लेखी शब्दाचा मान राखून आम्ही उपोषण स्थगित करत आहोत. मात्र, महावितरणने पुढील ४८ तासांत वीज पुरवठा पूर्ववत केला नाही, तर शेतकरी कोणतीही पूर्वसूचना न देता कार्यालयाला टाळे ठोकतील.”
— शिवाजीराव बंडगर (अध्यक्ष, उजनी धरणग्रस्त संघर्ष समिती)निर्णयाचे सर्व नेत्यांकडून स्वागत
प्रशासनाने लेखी पत्र सुपूर्द केल्यानंतर उपस्थित शेतकऱ्यांनी एकच जल्लोष केला. यावेळी संघर्ष समितीचे उपाध्यक्ष भारत साळुंखे, आदिनाथ कारखान्याचे व्हाईस चेअरमन महेंद्र पाटील, माजी संचालक नवनाथ शिंदे, बाजार समितीचे माजी संचालक विजय नवले, तसेच रंगनाथ शिंदे, अखलाक जहागीरदार, संपत सरडे व दिलदार मुलानी यांसह उपस्थित सर्वच प्रमुख नेत्यांनी प्रशासनाच्या या निर्णयाचे स्वागत केले. मात्र, प्रत्यक्ष अंमलबजावणी होईपर्यंत यंत्रणेवर करडी नजर ठेवण्याचा इशाराही सर्वांनी दिला आहे.
