करमाळा शहराच्या पिण्याच्या पाण्याचा प्रश्न लवकरच सुटणार – महेश चिवटे
करमाळा(दि.२१) – करमाळा शहराला सुरळीत पाणीपुरवठा करण्यासाठी नवीन मोटारी खरेदी करण्याचा मार्ग मोकळा झाला आहे. यानंतर शहराला दररोज पाणीपुरवठा होईल, अशी माहिती शिवसेना जिल्हाप्रमुख महेश चिवटे यांनी माध्यमांना दिली.
चिवटे यांनी सांगितले की, या मोटारीं खरेदीसाठी माजी आमदार संजयमामा शिंदे यांच्या कार्यकाळात निधी मंजूर झाला होता, परंतु तांत्रिक अडचणींमुळे काम रखडले होते. याबाबत जिल्हाधिकारी कुमार आशीर्वाद यांना निवेदन देऊन वस्तुस्थिती मांडली असता त्यांनी तात्काळ प्रशासकीय मंजुरी देण्याचे आदेश दिले.
सध्या करमाळा शहरातील नागरिकांना दर चार-पाच दिवसांनीच पाणी मिळते. दहिगाव येथील पाणीपुरवठा योजनेसाठी लावलेल्या २५ वर्षे जुन्या मोटारी वारंवार बंद पडतात आणि त्यामुळे शहरात टंचाई निर्माण होते. नवीन मोटारी बसवल्यानंतर दहिगाव येथून पूर्ण क्षमतेने पाणी उपसा होऊन करमाळ्याला दररोज पाणीपुरवठा शक्य होणार आहे.
दरम्यान, दहिगाव योजना सध्या १० किलोमीटर दूर जेऊर सब स्टेशनवरून विजेवर चालते. परंतु केवळ २०० मीटर अंतरावरील दहिगाव सब स्टेशनवरून कनेक्शन दिल्यास विजेचा दाब वाढून मोटारी सुरळीत चालतील, असा मुद्दा चिवटे यांनी मांडला. या संदर्भातही जिल्हाधिकाऱ्यांनी वीज वितरण कंपनीला तातडीने कारवाईचे निर्देश दिले आहेत.
“रक्कम मंजूर झाली असली तरी नगरपालिका प्रशासनाने तात्काळ टेंडर प्रक्रिया पूर्ण करून दर्जेदार कंपन्यांच्या मोटारी खरेदी कराव्यात. तसेच वीज वितरण कंपनीने ठराविक शेतकऱ्यांचा फायदा न बघता करमाळ्यातील ५० हजार नागरिकांच्या पिण्याच्या पाण्याचा प्रश्न सोडवावा. अन्यथा आम्हाला आंदोलनाचा मार्ग स्वीकारावा लागेल.” – महेश चिवटे
