ट्रॅक्टर चोरणाऱ्यास रंगेहाथ पकडले
करमाळा / संदेश प्रतिनिधी :
करमाळा (दि.११) : जिंती येथे साडेपाच लाख रूपये किंमतीचा ट्रॅक्टर चोरून नेणाऱ्या चोरट्यास ट्रॅक्टर मालकाने रंगेहाथ पकडले आहे. ही घटना ९ ऑक्टोबरच्या पहाटे तीन वाजण्याच्या सुमारास घडली आहे. याप्रकरणी राजेंद्र बाळासाहेब भोसले यांनी फिर्याद दिली आहे.
त्यात त्यांनी म्हटले आहे, की माझ्याकडे महिंद्र कंपनीचा ६०५ हा ट्रॅक्टर एमएच ४५ एडी ९४४० असा असून ९ ऑक्टोबर रोजी रात्री पावणेबाराच्या सुमारास मी व माझ्या घरातील सर्वजण झोपी गेलो होतो. पहाटे तीन वाजण्याच्या सुमारास घराबाहेर आलो असता, ट्रॅक्टर नजरेस न पडल्याने ट्रॅक्टरच्या टायरच्या निशानीवरून पुढे गेलो असता दगडाच्या बांधाला ट्रॅक्टर अडकलेला दिसला. तेथे एक व्यक्ती ट्रॅक्टर काढण्याचा प्रयत्न करत असल्याचा आढळून आला.
त्यानंतर मी, माझा भाऊ अभिजीत, वडील बाळासाहेब असे तिघांनी मिळून लपतछपत जाऊन जागीच त्याला पकडले. त्यानंतर त्याची चौकशी केली असता त्याचे नाव राम राजेंद्र कांबळे (रा. पांडूरंग मंदिराजवळ, चौबारागल्ली, बिदर कर्नाटक राज्य) असे सांगितले. त्यानंतर आम्ही करमाळा पोलीस स्टेशनला संपर्क करून त्यांच्या ताब्यात सदर व्यक्तीस दिले. पुढील तपास करमाळा पोलीस करत आहेत.
